Më datë 7 Janar, 2011, Kryetari i Akademisë së Shkencave së Shqipërisë Akademik Gudar Beqiraj dhe Sekretari Shkencor pranë këtij institucioni, Akademik Salvator Bushati kryen një vizitë në Kampusin e ri të Universitetit Epoka.

Ata u pritën në një takim nga Rektori i Universitetit Epoka, Prof. Dr. Hasan Kaplan, si dhe zv. rektorët Prof. Dr. Omer Eroglu dhe Dr. Ferdinand Gjana.

Prof. Dr. Gudar Beqiraj shprehu urimet më të përzemërta për Kampusin e ri të Universitetit Epoka. “Ju përgëzoj për punën tuaj. Jam i surprizuar dhe them me bindje të plotë që ne kemi nëvojë për ambjente të tilla akademike”, u shpreh ai.

Më tej ai shprehu dëshirën për të bashkëpunuar më ngushtë me Universitetin Epoka. “Ne kemi mjaftueshëm pika të përbashkëta për të bashkëpunuar. Do të mbështes fuqishëm publikimet e stafit tuaj në revistën shkëncore që publikon Akademia e Shkencave. Gjithashtu jam i hapur dhe mirëpres çdo mundësi tjetër bashkëpunimi, përfshi organizimin e Konferencave të përbashkëta shkencore”, deklaroi Prof. Dr. Beqiraj.

Nga ana e tij, Rektori i Universitetit Epoka, Prof. Dr. Hasan Kaplan pasi falenderoi miqtë për viziten bëri një prezantim të kampusit të ri të Universitetit si dhe i informoi ata mbi bursat e shumta që ofrohen për studentët e shkëlqyer shqiptarë.

“Një nga politikat tona është thithja e studentëve të suksesshëm shqiptarë në Perëndim. Universiteti Epoka nuk i ka kushtuar rëndësi përfitimeve financiare, porse kërkimit dhe publikimeve shkencore”, deklaroi Prof. Dr. Kaplan.

Në përfundim të takimit, Akademikët Beqiraj dhe Bushati patën mundësi të shohin më nga afër ambjentet e auditoret, bibliotekën si dhe laboratorët shëkncorë të Universitetit Epoka.

Akademia e Shkencave e Shqipërisë është themeluar më 1972 dhe është institucioni më i rëndësishem shkencor në Republikën e Shqipërisë. Ajo përfshin shkencëtare nga më të shquarit - akademikë, që zhvillojnë veprimtari kërkimore në institute dhe qendra kërkimore, si dhe organizma të tjerë shkencorë brenda dhe jashtë vendit.